نشر عدد من أصدقاء الشهيدة شيماء الصباغ المعروفة بـ”شهيدة الورد” تسجيل فيديو لها أثناء إلقاءها قصيدة من تأليفها تحمل عنوان “تذكرة قطر” بالتزامن مع الذكرى الأولى لمقتلها حيث كانت قد نشرت ديوان واحد قبل مقتلها تحت عنوان “على ضهر التذكرة” وتم نشر الطبعة الثانية منه خلال العام الماضى.
“تذكرة القطر”
مش غريبة
لما تقومى فى نصف الليل
تنكشى فى شجرة العيلة
ولما ابتدى التفكير
ألاقى نفسى مالكة حقيقة
مش فروع عيلة وجذور ونسب
ومش نسبة وتناسب
بأملك جسم
يسمع بممارسة الجنس
وقلب بيغفر الذنوب
وعين بتعرف تلمح الراجل
اللى بيقول على نفسه عبيط
عشان مايدفعش تذكرة الأتوبيس
إسكندرية
قهاوى نص البلد
الناس المصممة تدخل
فى قصايدى
غصب عنى
أو يمكن تحصيل حاصل
صورة لحبيبى
والملح اللى مصر ياكل اطرافها
أغنية لمنير
فجر باليود
إسكندرية مواحشانى
القاهرة
ليل منزوع الدسم
مظاهرة … الحكومة فيها اكتر م الناس
كوباية شاى بالهم و الوحدة
شنطة إيدى غلسة و مليانة
كام تذكرة قطر
كشكول بيزك على محاضرة
ومحاضرة لأ
قلم من غير سنون
كام قصيدة مش كاملين
فتافيت البسكوت البايته
وهدومى الداخلية
اللى طبعا عايزة غسيل
وأنا …..
لسه باشتغل زى زمان
مجرد ملاغية أرجوز
2007-2003
