من المواقف الإنسانية التي تحمل أيضًا الكثير من الطرافة، موقف حكاه الفنان الراحل إبراهيم نصر عن صديقه النجم أحمد زكي، وهو أن أحمد زكي قرر عزومة إبراهيم نصر في محل كباب وكفتة بالسيدة زينب على الرصيف، وبعد أن أحضر الكبابجي الطعام جاء كلب باحثًا عن أي طعام وهنا جري وراءه صاحب المحل وركله بقدميه ثم جاء بعصا وكاد أن يضربه بها، حتي قام أحمد زكي ودافع عن الكلب ومنع الكبابجي من ضربه، بل طلب منه إحضار كيلو كباب وكفته للكلب مخصوص وقال له: اعمله هنا على الرصيف سرفيس كامل وسلطات وكل حاجة كإنك بتنزل لزبون.
ويكمل إبراهيم نصر حديثه قائلاً: كان أحمد زكي كل شوية ينده علي الكبابجي ويقوله: هاتله سلطة.. هاتله عيش.. وكأنه عاوز يبسطه وينسيه تعب الضرب والإهانة.
وقال إبراهيم نصر خلال البرنامج الذي ظهر فيه قبل وفاته: الغريب إن الكلب كان بياكل وهو خايف وعمال يبص وراه.. لأنه تعود أن مفيش لقمة بتيجي سالكة كده.. راح أحمد زكي باصصلي وقايلي: شوف خايف إزاي حتى والأكل جايله مخصوص مش سرقة.. صعب أنك تخلي حد يطمن بعد ما عاش طول حياته في خطر.. اللي بينكسر مننا وبيتخان مبيصدقش أن ممكن حد يحافظ عليه تاني.. وبيعيش حياته بيتلفت وراه كده.. لو الناس تعرف الأذى اللي بتسببه للحيوانات والبشر هيعرفوا انه مبيتنسيش مهما طال الزمن وهنعيش مروشيين بسببهم.
