شريف منير: عملنا حلقات “إجازة مفتوحة” في 61 يوم وسميحة أيوب بقت أمى بجد

مصر تلاتين الاخباري - وكالات

0 79

حل الفنان شريف منير، ضيفا في برنامج “كلمة أخيرة” للإعلامية لميس الحديدى، المذاع على قناة ON، وتحدث الفنان عن مسلسل “إجازة مفتوحة” قائلا: “وقت ما كنت قررت اعمل حاجة والحاجات اللى بتيجى ليا مش بتعجبنى سعيت لغاية لما قابلت محمد إمام قالى روح لأحمد أبو زيد قالى هتلاقى عنده حاجات كويسة، وروحت وكلمته وأكنى روحت لدكتور نفسانى، وقعدت قلتله مش لاقى ورق وقالى عندى فكرة وهى مسلسل إجازة مفتوحة”.

وأضاف شريف منير: “كان المفروض أحمد شفيق هو اللى يخرج المسلسل، وكان وقتها الكورونا، وقال هانصور إزاى بالكمامات واظهر تعابير الوش، واعتذر وبعد كده ربنا بعتلنا المخرج محمد حماقى، وهو شخص محترف وملتزم ولديه شخصية في عمله”.

وتابع شريف منير: “دى أول مرة أعمل مسلسل من 40 حلقة، وكان أصلا 45 بس حاولت جاهدا عشان تقليله، واللى الناس متعرفهوش أننا اشتغلنا 8 أيام وتوقفنا 3 شهور؛ بسبب ظروف إنتاجية ووقت مسلسلات رمضان، وفجأة لازم نشتغل عشان العرض قرب، فعملنا الـ40 حلقة في 61 يوم، وكنا كل يوم بنشتغل من 18 إلى 22 ساعة وتعبنا جدا، ولكن الطاقة اللى جاية من حب الناس وحبنا لبعض ووجود سميحة أيوب كانت حلوة جدا”.

واستطرد: “سميحة أيوب كانت سند كبير جدا وليا بشكل خاص لأنه نتج عن العلاقة دى إنها بقيت أمى بجد، ولما خلصنا المسلسل بقينا نقعد نتكلم سوا وأروحلها البيت اشرب الشاي معاها، وعندها عزيمة تعمل شغل تانى وده عجبنى فيها جدا وده جزء كبير من قوتها وحضورها، وإحنا في وسط الشغل قالتلى عاوزين نعمل مسرح سوا وقلتلها يا ريت”.